140-годдзю Якуба Коласа прысвячаецца…
Мой родны кут, як ты мне мілы!..
Забыць цябе не маю сілы!
Кожны з нас ведае, чым адметны 2022 год для беларускай літаратуры і Беларусі ўвогуле. Менавіта ў гэтым годзе мы святкавалі 140-годдзе з дня нараджэння самых знакамітых пісьменнікаў нашай Радзімы — Янкі Купалы і Якуба Коласа. Гэтыя людзі падымалі прэстыж беларускай мовы. Кожнае яе слова яны любілі і песцілі, як добрыя бацькі любяць сваё дзіцятка. Але ў той жа час пісьменнікі загартоўвалі моц нашай мовы, шліфавалі яе да аксамітнага бляску, надавалі сотні адценняў, знаходзілі з самых нетраў паўзабытыя словы. Яны неслі ў народ беларускую мову, чыстую, яскравую, мілагучную. Іх творы чыталі і чытаюць зараз і дзеці, і дарослыя. І наўрад ці знойдуцца іншыя людзі, якія зробяць больш для роднай мовы і літаратуры, для Беларусі. Менавіта таму і святкуецца гэта дата па ўсёй краіне.
З творчасцю Янкі Купалы і Якуба Коласа школьнікі знаёмяцца яшчэ ў пачатковых класах школы. У старэйшых класах скарбонка ведаў пра творчасць пісьменніка папаўняецца. Аднак, важна паказваць не толькі багацце і прыгажосць творчасці паэта, але і расказваць вучням пра яго жыццёвы шлях.
3 лістапада 2022 года кіраўнік аб'яднання "Кнігалюбы" Ірына Аляксандраўна Куц правяла завочнуюэкскурсію па творчасці Я.Купалы і Я.Коласа, прысвечаную 140-годдзю пісьменнікаў. У межах якой былі акрэслены асноўныя этапы жыцця паэтаў, прадэманстраваны відыефільм, з якімі звязаны кожны жыццёвы перыяд Я.Купалы, у тым ліку і вёска Вязынка, дзе зараз размяшчаецца музей-сядзіба прагледжаны фільм “Я – часавы вандроўнік”, у якім Соф’я Пятроўна Міцкевіч распавядае пра жыццё і творчасць Я.Коласа. Вучні прачыталі верш Я.Купалы “Жняя” і ўрывак з паэмы “Новая зямля” Я.Коласа "Мой родны кут, як ты мне мілы!..."
Завочная экскурсія была цікавай і павучальнай. Правядзенае мерапрыемства дапамагло зразумець вучням значнасць творчасці Янкі Купалы і Якуба Коласа, спрыяла выхаванню павагі да народных песняроў, любові да роднага слова.
Імёны Купалы і Коласа назаўсёды ўпісаліся ў гісторыю Беларусі, і нельга сказаць, што творы і іх героі старамодныя або незразумелыя сучаснай моладзі. Кожны верш, кожны твор актуальны і зараз, бо пісьменнікі закраналі вечныя тэмы — тэму Радзімы, мастацтва, кахання, чалавека і грамадства, роднай мовы…
Будуць жыць святыя імёны Якуба Коласа і Янкі Купалы, пакуль будуць жыць беларусы!
